I te Huarahi │On the Road Ākuhata 2017

Nā Paora Tibble, Kaiwhanake ā-Iwi rāua ko Migoto Eria, Pouwhirinaki ā-Iwi

Paora Tibble and Migoto Eria have translated the latest  I te Huarahi | On the Road  blog post for Te Wiki o te Reo Māori.

I te 16 o Hūrae kua hipa, ka hinga a Cliff Whiting. He tāne, he pāpa, he ringatoi, he tohunga whakairo, he nukarau, he kāpehu, ko ia te Kaihautū mātaamua o Te Papa Tongarewa. Kei te pukapuka a Ian Christensen ngā kōrero mōna, Cliff Whiting: He Toi Nuku, He Toi Rangi. He pukapuka reo rua mō tēnei rehe nāna ngā mahi auaha i whakairi ake ki te toi o ngā rangi.

Te whare i hangaia e Cliff, Te Hono ki Hawaiki. Nā Norm Heke tēnei whakaahua.

I te tau 2012, ka urupounamu i te koroua rā. Ko tā Cliff he tārai kōrero, ‘I te tīmatanga ko te kore … nāwai rā ko te pō, pō nui, roa … ka puta tāua te ira tangata ki te whei ao, ki te ao mārama, tihē mauri ora!’ Koia te tikanga toi i whāia e kātuarehe, kia puta āna mahi toi ki te whei ao, ki te ao mārama!

Ko Māui Nukarau i tana tari o te ora, i Kororāreka (2012). Nā Norm Heke tēnei whakaahua.

Kotahi te toi rākau a te uri o Kaiāio ki te Motu, he mano, he mano, he mano! Ko ia ko Cliff Whiting (1936-2017), kua riro ki tōna hoa, ki a Heather, otirā, ki te iwi nui kei te pō e whanga mai rā mōna. Kei te pāpa o Te Papa, okioki rā i te tūturutanga o te ora.

He nui ngā mahi ki Te Whanganui a Tara me ngā pito o te motu mai i tērā o ngā pōhi i Haratua. Pānuitia ēnei o ngā mahi:

Te Pōhiri ki a Rongowhakaata me āna Taonga ki Te Papa

I te ata o te 11 o Hune, i whakaekea a Te Papa e ngā uri o Tūrāhiri me āna taonga. Koianei pea te tirohanga roa a te momo pēnei a Cliff Whiting i te wā i whakatau ai tēnei tū kaupapa. Ehara i te hanga noa!

Ko ngā taonga kei te whanga kia kawea e ō rātau uri mā Te Ara a Hine. Nā Eloise Wallace (Tumuaki, Tairāwhiti Museum) tēnei whakaahua

Pāorooro ana Te Papa Tongarewa i te tangi a te taonga puoro, a ngā karakia, a ngā reo karanga. Waipuketia ana te marae i ngā roimata o ngā uri. Uhia te mahau o Te Hono ki Hawaiki ki ngā taonga a Rongowhakaata. Rū ana a Rongomaraeroa i te whaikōrero, i te mōteatea. Ka pā te ihu ki te ihu.

(l)Ko ngā taonga, tīpuna me ngā uri o Rongowhakaata kei te mahau o Te Hono ki Hawaiki. (r) Takoto mai! Te waka! Nā Eloise Wallace (Tumuaki, Tairāwhiti Museum) ngā whakaahua

Kei whea mai ki tēnei tū momo kaupapa. Ka waiho mā te iwi āna taonga e kōrero, koia te mana o Tūranga tangata rite ka whakaatuhia ki Te Papa, mai i te 29 o Hepētema, 2017. I Te Papa, ko ēnei tū kaupapa te whakatutukitanga o te Mana Taonga.

Read more about the Mana Taonga principle on Collections Online: Taonga Māori at Te Papa

National Services Te Paerangi Wānanga Papa Taonga, Te Papa

I taku mahi, ka haere au i te nuku o te whenua, he āwhina i ngā hapū ki te tieki i ā rātau taonga. Ka kōrero tahi mātau hei whakarite papamahi ki ngā marae. Ka whakamahia ngā mātanga pēnei  i a Rangi Te Kanawa (Kaitiaki Papanga Māori) o Ngāti Maniapoto, i a Vicky-Anne Heikell (Kaitiaki Taonga Pepa) o Te Whānau-a-Apanui.

(mai i te rewhe) Ko Lynne Carmichael mātau ko Nancy Thompson, ko Chris Harp, ko Stephen Hebbendbach, ko Victoria Esson, ko Paora Tibble, ko Anaru Rondon, ko Shane Pasene

Nāku tētahi papamahi i whakarite mō taku kapa, mō National Services Te Paerangi. Me kore ake  mātau i a Shane Pasene (Kaitekiniki Kohinga Taonga) rātau ko Rangi Te Kanawa (Kaitiaki Papanga Māori), ko Andrea Hearfield (Kaitiaki Taonga) hei ārahi i a mātau ki te waihanga papa taonga.

Ka tīmata tā mātau kaupapa ki te karakia, ka whakawhanaunga mā te whakakōrero i ā mātau taonga. I reira ka kitea ngā iti kahurangi a ōku hoamahi. I ākona mātau ki ngā tikanga tieki taonga. He ngahau, he whakangūngū hoki tēnei mahi, kia pai taku mahi ki ngā papamahi puta noa i te Motu.

Ngā haerenga ki Pakipaki me Matakohe

Ka pōhiritia i tō mātou Pouwhirinaki ā-iwi a Migoto Eria te tuhi mō ētahi o ō māua mahi ki ngā pito o te motu i te Hōngongoi.

Wānanga Tiaki Taonga, Houngarea Marae, Pakipaki (14-15 Hurae 2017)

I tae atu ki Pakipaki i te ata mākū, ka kawea atu a Rangi Te Kanawa me tō mātou ope ki runga i a Houngarea. Hei muri, ka tīmata tō mātou mahi. Ko ngā momo taonga i whakahuihui mai, ko ngā haki Ratana, ko tētahi haki marae, he kete, he piupiu, he kākahu me tētahi tīpare. He nui ngā mahi kei mua i ō mātou whānau i tae atu ki taua hui, arā, he tapahi kāri, he whakapiri kāpia wera, he tuitui perehunga kirihou … Wii te nui o ngā mahi! He waimarie nō mātou, he kaha ngā ringa wera, a Jill Munro me tōna whanau ki te whāngai i a mātou, e kore te hiakai e rangona. I te rangi whakamutunga kua tutuki pai ngā mahi o tā mātou rōpū, ko ngā taonga te kaupapa i kaha whakahuihui i a mātou anō. He mihi nui ki a Rangi mō tōna ārahitanga, ki te hau kāinga anō hoki mō te manaakitanga me te aroha.

Ko te hunga i whakamine mai ki Pakipaki i runga i te reo karanga o ngā taonga tīpuna. Nā Migoto Eria te whakaahua nei

Ngā whānau e mahi ana me Rangi Te Kanawa (kei te mau pōtae). Nā Migoto Eria te whakaahua nei

Check out the He Rauemi Resource Guide on Caring for Māori Textiles

Te mahi a ngā Māori me ngā whare taonga, Matakohe

I tēnei haerenga ka tae atu mātou ki te rohe o Te Uri o Hau, ki Ngāti Whātua. Ko te rākau kauri tō rātou tupuna matua ki tērā takiwā, i kaha tiakina, arohaina hoki e rātou o Matakohe. Nō te taenga atu ki Te Whare Taonga Kauri, ka rangona, ka kitea hoki tōna mana. Ka tīmata ngā tirohanga ki te wāhi kohinga kāpia. Ko ngā pakitara katoa o tēnei wāhi kua hanga ki te kauri, rākau tūturu anō hoki. Nōku te pōhēhē ka mutu te tirohanga i konei. I te mutunga iho, mārama katoa au e kore e taea te whakataha noa i ngā tirohanga. He tino whare taonga tēnei, tōna nui, tōna rahi, koinei tōna anō mana.

Tūturu, he whare taonga tēnei whare kauri! Nā Migoto Eria te whakaahua nei

Ko te whare Tōtara, he whare tawhito e 5 mēneti mai i Te Whare Taonga Kauri. Nō te whānau Smith te whare nei, ā, ka whānau mai ngā tini tamariki, mokopuna anō hoki i roto i tēnei whare o rātou. Nā Pete rāua ko Tracey mai i te whare taonga mātou i arahi, ki tirohia ngā rawa o roto. Ko Pete, he tangata mātau ki ngā hītori o Matakohe, nāna ngā kōrero i whāngai ki a mātou. Kei muri i te whare Tōtara, tētahi pā harakeke kei te tiakina e ngā iwi o tērā takiwā.

Ko ngā whakaahua o te whare Tōtara. Nā Migoto Eria te whakaahua nei

Hei te mutunga o taua wiki, ka tūtaki māua ki te hunga nei, e 23 o rātou mai i ngā whare taonga o te Taitokerau. Kotahi te rangi ki te wānanga i ngā kaupapa pēnei i te ture tiaki i ngā taonga tūturu, te Tiriti o Waitangi, te mana taonga me te manaakitanga o roto i ngā whare taonga. He hui mīharo tēnei me te tūtaki i ngā kaimahi whare taonga o te Taitokerau, he mihi nui ki a koutou, me te Whare Taonga Kauri hoki.

Learn more about the ServiceIQ National Certificate in Museum Practice

Ko ngā pia o te wānanga ki te Kauri Museum, Matakohe. Nā Migoto Eria te whakaahua nei

Nā māua ko Migoto me ngā mihi o Hinekōanga ki a koutou katoa,

Paora Tibble
Ngāti Porou, Tūwharetoa, Raukawa, Te Whānau-a-Apanui
Kaiwhanake ā-Iwi

Migoto Eria
Ngāti Kahungunu, Ngāti Pāhauwera, Tūhoe, Raukawa, Nihona
Pouwhirinaki ā-Iwi

About National Services Te Paerangi

National Services Te Paerangi works with museums, galleries, iwi (tribes), and related organisations to enhance museum services and support these to become self-sustaining.
This entry was posted in Blog, On the road. Bookmark the permalink.

Leave a Reply

Your email address will not be published. Required fields are marked *